Fragmen Suminten Edan

Fragmen Suminten Edan

Casting:            -Warok Suramenggala  :

                        -Warok Gunaseca                    :

                        -Raden Subrata                        :

                        -Cempluk Warsiyah                  :

                        -Suminten                                 :

Babak 1.

Adegan 1. Raden Subrata langen asmara lan Cempluk Warsiyah

Subrata            : Piye nimas apa kira-kira sliramu wis madhep mantep nampa katresnane pun kakang wong ayu?

Cempluk          : Menapa mboten klentu ta Den? Kedahipun ingkang matur mekaten rak inggih kula. Menapa panjenengan mboten lingsem menawi njenengan mengku kula. Wong nyatanipun kula namung drajat anake demang.

Subrata            : Ora, Cempluk ngertenana sing diarani tresna iku ora mawas endhek dhuwuring drajat pangkat nanging ati sing dadi pawitane. Sakbisa-bisa Raden Subrata ora nyawang gebyaring wanita mung saka drajat lan pangkate wong ayu.

Cempluk          : Menawi mekaten lha mbok inggih kula namung sendika ngestokaken dhawuh panjenengan. Sinten ta ingkang nulak menawi badhe kawengku dening panjenengan dhasar piyayine nggih gagah, bagus…

Subrata            : hahaha… iya sukur wong ayu… Gandheng paman Suramenggala ya wong atuwamu uga wis nyarujuki sesambunganku lan sliramu.

Cempluk          : Kados pundi menawi pemanggihipun Gusti Adipati Dibya Ngalim inggih kang rama?

Subrata            : Perkara kanjeng rama tinemu gampang. Mengko aku sing matur…

Adegan 2. Bakul dhawet

Gunaseca         : Dhawet Den…

Subrata            : Iya Pak kene… Nimas pun kakang ngorong banget kepengin ngunjuk dhawet

Cempluk          : Kula nggih ngorong sanget Den…

Gunaseca         : Wah Dhawete kantun setunggal niku Den

Subrata            : Ya wis ora dadi ngapa. Mara age racikna

Cempluk          : Lha panjenengan napa mboten ngunjuk Den?

Subrata            : Mengko aku bisa ngunjuk unjukan liyane bakune sliramu ora ngelak

Gunaseca         : Niki Den dhawete. (Menehke dhawet dibayar njur lunga)

Subrata            : Gage ndang diombe Jeng…

Adegan 3. Cempluk mati, Suramenggala prapta

Subrata            : Pluk… lha kok malah turu ning kene… Pluk tangi Jeng… Pluk Cempluk… lho….

Suramenggala   : Kok bengok-bengok enten napa Den? Lha niku Cempluk kok turu teng ngriki. Mbok ken ndang tangi…

Subrata            : Paman Suramenggala, Cempluk pejah paman…

Suramenggala   : Lho… niki wau kenging napa kok ngantos Cempluk mati?

Subrata            : Niku wau bibar nginum dhawet lajeng kantaka.

Suramenggala   : O… nggih, niki jenenge Dhawet Upas. Mpun Cempluk kula warasne lajeng mang bekta wangsul dhateng Ngampel. Pluk durung wancine nduk, tangi ndukkk…

Cempluk          : Lho Pak… Den…

Suramenggala   : Ya nduk saiki kowe karo Denmase Brata baliya dhisik nang Ngampel aku arep ngadili wong luput iki…

Adegan 4. Gunaseca prapta saperlu nonton kahanane Cempluk.

Suramenggala   : He mandeg kisanak…

Gunaseca         : Hahaha Kakang Nggala…

Suramenggala   : Wong tuwek ora genah ki ya dhapurmu kuwi

Gunaseca         : Hahaha kakang Nggala, apa karepmu ngucap kaya ngono

Suramenggala   : Kowe aja selak. Kowe sing mateni ponakanmu si Cempluk lantaran dhawet upas

Gunaseca         : Ya tak akoni. Pancen aku sing tumindak. Merga kowe wong tuwa ora isa nuturi anak. Aku nganti kewirangan ya merga pokal gawemu. Ngiras dina iki tak rampit kakang Nggala.

Suramenggala   : O cethane ngajak benthak sirah ya Le tak ladeni.

Gunaseca         : Modar kowe kakang Nggala.

(Suramenggala perang lan Gunaseca. Suminten teka)

Suminten          : Hahahahaha Denmas aku cinta padamu denmas… hahahaha aku aja mbok tinggal ta denmas… aku tresna panjenengan lho Denmas… Denmas Brata…

Gunaseca         : Iki lho Kang… sawangen ponakanmu, nganti edan merga wurung dhaup lan Denmase Brata. Saiki upama kowe dadi aku apa ora nelangsa…

Suramenggala   : Hmmm Yen ana lelakon kaya ngene ki mbok dirembug sing sareh. Ora grusa-grusu kaya kelakuanmu ngono kuwi. Ya sejatine aku ki ora nduwe karep pengin njodohne ponakanmu Cempluk karo Denmase Brata. Nanging wong jenenge tresna aku ora bisa meksa. Ya wis sing baku ngene Suminten tak warasne dhisik… Ten asalmu waras balik waras nduuukkkk…

Suminten          : Pak… lha kok nganti kaya ngene… aku isin Pak….

Suramenggala   : Ten… ora maido sepira larane atimu. Ning eling den eling Ten… yen pancen Denmase Brata kae jodhomu ora bakal adoh karo kowe. Sing baku saiki Suminten wis ora edan…

Fragmen Babad Tulungagung

Fragmen 15 menitan

Adipati Kalang Gugur

(Serial Babad Tulungagung)

Sutradara:        Faisal Dhony

Paraga:                        -Rara Kembangsore:Arum

                        -Adipati Kalang: Hamdan S

                        -Retna Mursada: Jenita

                        -Rara Ringgit:Dian

                        -Patih Harya Permada:Wiyandi

                        -Patih Barerangkas: Bheni

                        -Adipati Menaksopal: Teguh

-Ki Sarwa: Deni Sidik

                        -Ki Sarwana: Riza Koetjhoen

                        -Prajurit Majapahit: Mugsan, Afik, Kithir.

                        -Prajurit Tanggulangin: Sureng, Bandot, Ikrar

Babak 1.

Casting: Harya Permada, Kalang, Menaksopal, Jurit Majapahit, Jurit Tanggulangin, Barerangkas.

Adegan 1. Gepuk Tanggulangin kalah Kalang nungkul.

Iringan: Srepeg Metaraman lajeng kasesegaken katampen Lancaran Perang, Kalang majeng irama seseg lajeng suwuk.

HP       : Kalang kowe?!

AK      : Inggih Ki Patih, kula pun Kalang…

HP       : Yagene kowe nyembah sesedokan marang aku. Kamangka kowe sing mbaluhi sedulurmu sapeguron si Bedalem bupati Betak lan Kasan Besari supaya mbalela marang Majapait kanthi cara nyedani Pangeran Lembupeteng.

AK      : Adhuh Ki Patih, sewu-sewu kalepatan kula diagung pangaksaminipun. Kawuningana, sampun mboten kirang-kirang anggen kula ngemutaken dhumateng patrapipun Kangmas Bedalem lan Kakang Kasan Besari nanging menapa daya kula. Piyambakipun mboten nggega atur kula.

AM      : Hahaha Kakang Dipati Kalang, kowe aja goroh. Aku ngerti larah-larahe prahara ing Banarawa kepungkur. Kowe karo Kakang Kasan Besari nduwe sedya ala klawan Bapa Guru Kyai Pacet. Iya apa ora?

HP       : Wis wis… Sopal, aja nggedhekne anggonmu sujana klawan si Kalang. Pancen iku lelakon ing Banarawa nanging ora ngembet klawan lelakon sedane Pangeran Bedalem.

AM      : Inggih kanjeng, kula namung nyumanggakaken.

HP       : Kalang…

AK      : Kula Ki Patih…

HP       : Kowe tak ngapura sakabehing kaluputanmu, merga ora kabukten kaluputanmu. Lan aku nedha nrima klawan kowe jalaran kowe wis ngelingne tumindake Bedalem nadyan kowe gagar wigar.

AK      : Adhuh ngaturaken agenging panuwun Ki Patih.

HP       : Lan dina iki uga Kadipaten Betak tak pasrahake marang kowe borong apik eleke Bumi Betak. Prajurit…

Jurit     : Inggih kula…

HP       : Ayo nutugne laku mideri Brang Kidul (Iringan: Srepeg Mataraman suwuk saksampunipun Rara Ringgit prapta)

Adegan 2. Rara Ringgit prapta

RR       : Yayi Kalang…

AK      : O kangmbok Rara Ringgit mangga mangga

RR       : Ora nyana lelakon ing Betak kaya mangkene. Kakangmas Adipati Bedalem gugur cumemplung ing rawa. Banjur sapa yayi… sing mengkone ngayomi aku lan kawula ing Betak…

AK      : Kangmbok Rara Ringgit, kawuningana bilih saksampunipun perang antawisipun Majapait lan Betak rampung, Gusti Patih Harya Permada paring dhawuh bilih Bumi Betak dipun pasrahaken kaliyan kula. Dados ampun was sumelang kula ingkang ngayomi panjenengan saha kawula Betak.

RR       : Sukur yayi… nanging, sedane Kangmas Bedalem agawe kekesing atiku. Apa maneh, pulunanku Nini Kembangsore oncat saka kaputren, mbuh ana ngendi papane. Jalaran kepedhotan sih katresnane klawan Pangeran Lembupeteng.

AK      : He’em (dhehem) e… ngaten kangmbok. Bab sedanipun Kangmas Bedalem ampun sanget-sanget anggenipun nawung sungkawa. Keparaaaa…

RR       : Apa Yayi?

AK      : Dipun getunana kangmas Bedalem mboten saged gesang malih. Malah samangke kula aturi mikir ingkang taksih gesang mawon.

RR       : Kersane Yayi Kalang apa?

AK      : Kersaa panjenengan kula wengku garwa supados kinayoman gesang panjenengan kakangmbok Rara Ringgit.

RR       : Yayi Kalang, aja ngecomang calemong tembungmu. Aku isih nandhang sungkawa kaya mangkene teka kowe arep nambahi ruweting kahanan.

AK      : Kangmbok Ringgit, sakmenika panjenengan wis ora ana sing ngayomi kejaba mung Kalang. Mula manuta sun wengku garwa.

RR       : Ora, aku ora sudi ngladeni wong kaya dhedhapuranmu Kalang…

AK      : Wah rudha peksa tenan kowe… (srepeg Metaraman Seseg, ngantos Retna Mursada prapta kasuwuk)

Adegan 3. Rara Ringgit nyemplung sendhang. Retna Mursada prapta.

RM      : Kalang, ora nyana jebul nistha budimu. Kowe kumawani bakal ngrudhapeksa kadangku yayi Ringgit malah dina iki dheweke nglalu nyemplung sendhang.

AK      : Nggih kula akoni. Kula gandrung lan Kangmbok Ringgit. Lan malihipun Kadipaten Betak sampun dados panguwaos kula. Dados sampeyan mboten wenang nyaru wuwus pikajeng kula. Malah dinten samangke sampeyan kula aturi minggat saking Kadipaten.

RM      : Ora mbok tundhung aku bakal minggat. Lan ngertenana Kalang kabeh tumindakmu bakal tak aturke ing Majapait. (Iringan Srepeg Mataraman Seseg lajeng Kasuwuk)

Adegan 4. Kalang nimbali Barerangkas.

AK      : Tih Barerangkas!

PB       : Kula kanjeng…

AK      : Lan prajurit Tanggulangin kabeh wae…

Pt         : Kula kula kula…

AK      : Seksenana patine Kangmbok Ringgit nyemplung ing sendhang, mula sendhang kene yen besuk ana rejane jaman katelaha “SENDHANG RINGGIT”.(Iringan: Srepeg Mataraman Seseg) Barerangkas

PB       : Kula wonten dhawuh…

AK      : Dherekna lakuku nungka Kangmbok Retna Mursada, yen kecekel pateni..

PB       : Sendika ngestokaken dhawuh. (srepeg Mataraman)

Babak 2.

Casting: Rara Kembangsore, Sarwa, Sarwana, Patih Harya Permada, Retna Mursada.

Adegan 1. Rara Kembangsore diadhep siswane.

RK      : Kabeh siswaku…

SRW   : Kula Sang Empu

SRWN: Kula sang Empu

RK      : Iki dina bakal ana gaweyan kang abot kanggomu mula kowe kudu samapta.

SRW   : Inggih sang Empu kula namung ngestokaken dhawuh Sang Empu. (srepeg Mataraman)

Adegan 2. Harya Permada prapta.

RK      : Teja teja sulaksana tejane sang anyar katon, ngajeng pundi kang sinedya, wingking saking pundi papan dunungipun, tigas kawuryan sinten sambeting wangi.

HP       : Iya, aku warangka dalem ing Majapait Patih Harya Permada. Dene praptaku iki mung kepengin ngaso ing pertapan kene. Iki pertapan apa jenenge?

RK      : Inggih menika pertapan Gunung Bolo. Kula ingkang mangarsani name kula Empu Winadi.

Adegan 3 Retna Mursada prapta. (srepeg Mataraman Seseg)

RM      : Dhuh Sang Empu kula ingkang sowan. Kula nyuwun pangayoman sang Empu.

RK      : Nyai kena nggene sliramu kaya dene dibujung sardula kaya mangkono.

HP       : Loh kowe rak Retna Mursada…

RM      : Lho… Gusti Patih Harya Permada. Kawuningana, saksampunipun Kadipaten Betak kapasrahaken dening Adipati Kalang, piyambakipun tumindak sawenang-wenang malah damel pejahipun Yayi Rara Ringgit. Kepara kula samangke katundhung saking Kadipaten dados buroning andhahanipun Kalang.

(Kembangsore semaput) iringan Srepeg Mataraman seseg

SRW   : Lho sang Empu.. lha kok semaput iki piye…

SRWN: Wadhuh cilaka mencit iki… kados pundi niki Gusti Patih…

HP       : Sik aja gupuh. Retna Mursada coba rumatana Sang Empu Winadi kae…

RM      : Inggih Gusti Patih…

RK      : Ibu, niki kula pun Rara Kembangsore ibu….

RM      : Lho… anakku nini Kembangsore……(srepeg Mataraman seseg)

HP       : O… jebul Empu Winadi iki Rara Kembangsore.

RK      : Inggih Gusti Patih. Pramila saking menika lelampahan menika kedah enggal raampung. Sarwa lan kowe Sarwana tampanana pusaka iki lan pethukana Adipati Kalang. Pamerana pusaka iki nganti dheweke gelem tumeka ing papan kene.

SRW   : O inggih sendika ngestokaken dhawuh. (Srepeg Mataraman, Kalang sawadya tampil irama kasesegaken lajeng suwuk)

HP       : Sang Empu lilanana aku bakal pacak baris numpes Si Kalang sing wis cetha kaluputane.

Babak 3.

Casting: Kalang, Barerangkas, Prajurit Tanggulangin, Sarwa, Sarwana, Harya Permada, Prajurit Majapahit.

AK      : Ana cah ndesa nggawa pusaka sajak arep pamer. He kowe kuwi sapa?

SRW   : Kula Sarwa kanjenge niki adhi kula Sarwana. Lha niku sinten ana wong kok lemu endhek…

PB       : Aja angger muwus kowe aku Patih Barerangkas…

SRWN: O Patih Barang bekas…

PB       : Barangbekas dhenggelmu, Patih Barerangkas…

SRW   : O inggih, ngaten kanjenge, sowan kula niki badhe nyobi pusaka kula menika.

AK      : Hahahahaha… pusaka kaya cuthik enjet wae kok dipamerne hmmm…

PB       : Pusaka apa ganjel lawang kuwi…

SRW   : Lho ngenyek, cobi mang tingali….

AK      : Lho pusaka kok ampuh temen. Iya aku percaya. He Wa…

SRW   : Kula…

AK      : Pusakamu tak tukune, pira regane kandhaa…

SRWN: Anu kanjeng pusaka nika sejatosipun kula nyewa…

PB       : Andene pusaka silihan kok lehmu kementhus…

AK      : O alah Na Na… wis ya ben yen pancen iki pusaka silihan njur sing nduwe kuwi sapa?

SRW   : Niki sing kagungan Sang Empu Winadi saking gunung Bolo. Lha kula dipun weling kalihan Sang Empu bilih sok sinten kemawon ingkang mbetahaken pusaka menika kedah laku dhodhok saking ngriki ngantos dumugi gunung Bolo.

SRWN:  Inggih kanjenege lan saben pitung jangkah kedah nyembah dhumateng Sang Empu lan mboten pareng ndangak. Dospundi saguh napa mboten…

AK      : Iya saguh aku. Tih ayo dherekna lakuku…

Babak 4.

Casting: Rara Kembangsore, Patih Harya Permada sawadya, Kalang sawadya..

AK      : Dhuh Sang Empu Winadi kula nyuwun pusaka ingkang dipun bekta Sarwa lan Sarwana.

RK      : Kalang…

AK      : Wah… sajake iki Tih sing asmane Empu Winadi. Inggih kados pundi?

RK      : Yen wis antuk pusaka kuwi arep mbok nggo apa?

AK      : Inggih sepisan badhe kula damel sipat kandel, kaping kalih badhe kula damel ngrebahaken Majapait

HP       : Piye?!! (srepeg Mataraman Seseg)

AK      : Lho… mati aku…

PB       : Adhuh mati aku…

(Kalang diranjab gaman, wadya Tanggulangin mati)

HP       : Hmm… Jebul mung semono kasektenmu Kalang. (irama sirep utawi siyak, lajeng seseg malih)

(Kalang mlayu)

HP       : Ragane Kalang pating sluwir daginge. Kanggo pangeling-eling papan kene mbesuk katelaha “CUWIRI”. Lan prajurite Kalang akeh sing padha mati tumangsang ing wit aren. Mbesuk yen ana rejane jaman katelaha “BATHANGSAREN”. Bujung playune Kalang.

(Kalang diranjab lan kasembret-sembret anggane banjur ragane cumemplung kali)

HP       : Haa wis mati Kalang, kanthi kahanan awake disembret-sembret. Besuk yen ana rejane jaman papan kene katelaha “KALANGBRET”. Lan kali kanggo  papan pandhelikane si Kalang katelaha “KALI SONG”