Baskara Bumi Wilwatikta

Serial Singasari – Majapahit

Senjakala ing Singasari-Babad Alas Tarik-Wijaya Ngratu

Paraga:

1.     -Kaisar Ike Messin: Bagus Akbar

2.     -Panglima Sin Phe Kausin: Rizky Hastana

3.     -Wadya Tar-tar : Yoseph Vischa

4.     -Wadya Tar-tar : Imam

5.     -Prabu Jayakatong/Jayakatwang: Rizky Putra (Astuti)

6.     -Prameswari : Selvy

7.     -Patih Kebo Mundarang: Diki Fajar

8.     -Senapati Parungsari: Iing

9.     -Manteri Segara Winotan: Sain

10.                        -Senapati Ranggajanur: Pungki

11.                        -Arya Banyakwidhe/Arya Wiraraja: Pambayun

12.                        -Raden Ardaraja: Hadi

13.                        -Wadya Gelang-gelang: Joko

14.                        -Prabu Ciwabudha/Kertanagara: Danang Ragil

15.                        -Patih Kebo Anengah: Rozaki

16.                        -Senapati Gajah Pagon: Alip

17.                        -Prameswari Bajradewi: Titis

18.                        -Dyah Tribuwana: Yunita

19.                        -Dyah Gayatri: Ayun

20.                        -Wadya Singasari: Asyik

21.                        -Wadya Singasari: Mamlak

22.                        -Dyah Sanggramawijaya: Alvian

23.                        -Ken Sora: Ari

24.                        -Lawe: Rezky

25.                        -Nambi: Rhama

26.                        –Lurah Kudadu :Faisal Hindarto

27.                        -Emban 1: Rinda

28.                        -Emban 2: Erna

1.     Prolog

Kaisar Ikke Messi lan wadya bala tar-tar dumugi ing tlatah Nusantara. Sedyanipun kautus Kaisar Kubhilai Khan supados nyepeng Prabu Kertanegara jalaran sampun natoni dhuta saking Tar-tar. Prajurit kabidhalaken.

2.     Jejer Kadipaten Gelang-gelang

Prabu Jayakatwang kaadhep Prameswari, Patih Kebo Mundharang, Menteri Segara Winotan, Senapati Parungsari, Senapati Ranggajanur miwah para wadya. Ngrembag bab silsilah nagari Kediri ngantos dumugi Gelang-gelang. Kasaru praptanipun Adipati Arya Banyakwidhe ingkang mrayogekaken supados Prabu Jayakatwang nggebag nagari Singasari. Prabu Jayakatwang nyagahi tumunten mbidhalaken wadya Gelang-gelang.

3.     Tapel wates Singasari

Wadya Gelang-gelang kapapag wadya Singasari ingkang kapandhegan Patih Kebo Anengah miwah Senapati Gajah Pagon. Sulayanipun rembag dados pancakara. Patih Kebo Anengah gugur kalimpe Raden Ardaraja. Wadya Singasari kocar-kacir. Gajah Pagon mlajar manjing dhatulaya. Raden Ardaraja pinanggih Patih Kebo Mundharang paring kabar menawi Singasari sampun saged kagebag jalaran Prabu Kertanegara saweg lena. Bidhal.

4.     Taman Kaputren

Prabu Kertanegara saweg wuru nginum tuwak tuwin waragang dipunladosi dening kang garwa Prameswari Bajradewi, Dyah Gayatri, Dyah Tribuana saha dhayang. Kang garwa miwah kang putra kekalih ngemutaken Prabu Kertanegara parandene mboten dipunpaelu. Kedadak wonten abdi pacalang matur menawi Singasari kenepung wakul binaya mangap dening Wadya Gelang-gelang. Kasaru praptanipun Prabu Jayakatwang. Sulaya ing ginem Prabu Kertanegara dipunpejahi, prameswari saha putri kekalih dipun kunjara. Prabu Jayakatwang ngebroki praja Singasari.

5.     Kasatriyan

Dyah Wijaya, Ken Sora, Lawe, Nambi arsa nggempur wadya Gelang-gelang kasaru praptanipun Gajah Pagon matur menawi Prabu Kertanegara gugur. Garwanipun Dyah Wijaya kekalih dipunkukup Prabu Jayakatwang. Angles penggalihipun Dyah Wijaya, Ken Sora mrayogekaken supados Dyah Wijaya ngayom dhateng Songenep (Sumenep). Bidhal.

6.     Strat margi

Dhagelan dipunprepegi Dyah Wijaya saha pandherek manggihi Adipati Banyak Widhe. Ing pagedhonganipun Arya Banyak Widhe prapta ing ngriku jalaran nedheng niti jajahan. Dyah Wijaya pasrah dhumateng Arya Banyak Widhe nunten kalarapaken ing Prabu Jayakatwang bidhal.

7.     Adegan Kediri

Prabu Jayakatwang, Prameswari, Ardaraja, Kebo Mundarang, Arya Banyakwidhe, Dyah Wijaya. Rembag Dyah Wijaya nungkul dhateng Prabu Jayakatwang. Ketang welasipun dhateng putra pulunan lajeng pinaringan Bumi Wana Tarik kinen mbabat. Bidhal.

8.     Adegan Wana Tarik

Wadya bala pandherekipun Dyah Wijaya kraos sayah anggenipun mbabat lajeng methik woh Maja. Nuli katedha nanging raosipun pait. Dyah Wijaya paring nama bumi Tarik kanthi nami Majalengka inggih Majapait. Praptanipun Kaisar Ike Messi ingkang arsa ngrangket Prabu Kertanegara. Saking wasisipun Arya Banyak Widhe, Kaisar Ike Messi kablithuk kinen nungkulaken Wadya Kediri. Bidhal.

9.     Alun-alun Kadiri

Perang amuk-amukan. Segara Winotan gugur mengsah Lawe, Kebo Mundharang pejah dening Ken Sora, Ardaraja kacepeng nuli kabanda. Prabu Jayakatwang kakepung wadya Tar-tar lajeng muksa. Senapati Parungsari mengsah Dyah Wijaya, Senapati Parungsari gugur. Kaisar Ikke Messi nagih janji dhumateng Wijaya nanging mboten dipuntetepi kepara Wadya Tartar dipuntandangi Lawe saha Ken Sora mlajar ing nagrinipun.

10.                         Praja Majapait

Dyah Wijaya kawisudha minangka narendra jejuluk Prabu Kertarajasa Jayawardhana, Arya Banyak Widhe kaparingan bumi Lumajang, Ken Sora kajumenengaken Patih ing Daha ngrangkani Dyah Gayatri, Lawe kaparingan bumi Tuban kanthi sesebatan Adipati Ranggalawe miwah sinebat Manteri Nusantara, Nambi kawisudha minangka patih Mangkubhumi. Sareng midhanget Nambi nedya kawisudha minangka Patih, Ranggalawe muntab. (Candhakipun ing lampahan Ranggalawe-Lembusora-Gajah Biru-Juru Demung Gugur)

Babak 1

Paraga       : Ikke messi, shin phe kausin, wadya tar-tar

Setting        : strat

Adegan 1. Panglima Ikke Messi sawadya tumeka ing Pelabuhan Canggu

Ikke messi                   : Panglima Shin phe, adoh saka bumi tar-tar

Mongol aku lan kowe wis teka pelabuhan canggu.

Shin phe kausin           : iya, nitik saka lemah kang subur lan ijo royo-royo tetanduran iki genah wis tumeka ing tanah jawa

Ikke messi                   : Iya, ngertiya Shin Phe..

Shin Phe                      : Piye kakang

Ikke Messi                   ; Aku lan kowe kautus dening Kaisar Khubilai Khan ing Mongol kang supaya ngadili Sri Kertanagara ing Singasari

Shin phe kausin           : Mengko dhisik Kakang, blaka wae aku durung ngerti apa kersane Tuan Khubilai Khan kok ngutus awake dhewe tumuju ing Nusa Jawa ngadili Sri Kertanagara?

Ikke messi                   : Tenane mangkene, Sri Kertanegara iku kaangep luput kang sepisan dheweke ora gelem ngakoni yen kang nguwasani Jagad raya iku Tuan Khubilai Khan, kapindho Sri Kertanegara nate natoni dhuta saka ing Tar-tar. Mangka kowe ngerti dhewe yen sawijine dhuta iku ora kena cilike dilarani apamaneh dipateni

Shin phe kausin           : O mangkono, hla yen mangkene aku gamblang cetha ora mangu-mangu anggone tumandang gawe Kaisar. Banjur kersane Kaisar kepriye?

Ikke Messi                   : Kang dadi bingunge rasaku yaiku aku durung mangerteni papan dununge Kedhaton Singasari. Prayogane kepriye?

Shin Phe Kausin          : He kowe… sapa jenengmu

Wadya Tar-tar 1          : Kula inggih kawula panjenengan. Nami kula Cong Ik

Shin Phe Kausin          : Kowe Cong Ik?

Wadya Tar-tar 1          : Inggih panglima

Shin Phe kausin           : Hla iki, kowe ya wong asli Tar-tar

Wadya Tar-tar 2          : Inggih, nami kula Vis Cha

Shin Phe Kausin          : Iki Kaisar, wong loro iki becike diutus nggolek pawongan asli kene supaya nggolekne pawongan kang ngerti dununge kedhaton Singasari lan nuduhke dalan tumuju ing Singasari

Ikke Messi                   : mangkono uga becik. He kowe wong loro

Wadya Tar-tar             : Inggih dospundi Panglima

Ikke Messi                   : Kowe takutus goleki pawongan kang saguh nuduhke papan Kedhaton singasari dene aku lan Panglima Shin Phe bakal mbangun pasanggrahan ing papan kene

Wadya Tar-tar             : Sendika Tuan

Babak 2

Paraga       : Jayakatwang, Prameswari, Patih Kebo Mundarang, Mentri Segara Winotan, Sonopati Parungsari, Senopati Ranggajanur, Adipati Arya Banyakwidhe

Setting        : Kraton Gelang-gelang

Jayakatwang               : Heh Patih Kebo Mundharang,

                                      Rada maju pasebanmu sang Patih,

                                      Ingsun mundhut pawartamu,

                                      Matura kang prasaja,

kebo mundarang         : Sowanipun kang abdi manggih rahayu,

Parungsari                   : Miwah sagunging pra wadya,

                                      Anengga dhawuh sang Aji

Jayakatwang               : ya, dikepenakake anggonmu lungguh.

Kebo mudarang          : inggih gusti.

Jayakatwang               : senopati Ranggajanur?

Ranggajanur                : dhawuh tinimbalan gusti jayakatwang.

Jayakatwang               : aku kepengin mangerteni, kepiye kahanane Kadipaten gelang-gelang? Lak ya padha becik ta?

Ranggajanur                : inggih sinuwun, kawontenanipun Kadipaten gelang-gelang samenika hayom hayem tentrem boten wonten alangan satunggal menapa-menapa.

Jayakatwang               : syukur, yen ta pancen kahanane Kadipaten Gelang-gelang katon ayem tentrem ora ana kahanan apa-apa. Parungsari

Parungsari                   : Kula wonten dhawuh Sinuwun

Jayakatwang               : Sanajan sira iku sipate wanita nanging kowe pantes minangka satriyane praja

Parungsari                   : inggih sinuwun jalaran, kula sampun sumpah aprasetya bilih jejeripun wanita kedah tumut rumeksa karaharjanipun praja mboten namung kaum priya sinuwun

Jayakatwang               : Ndadekne bungahe atiku, pancen bener jejere wanita aja nganti kalah klawan jejere priya. Kepenakna anggonmu sowan

Parungsari                   : Mboten kirang prayogi sinuwun

Jayakatwang               : yayi Prameswari

Prameswari                  : Inggih kula kangmas Adipati

Jayakatwang               : Iki mau ndherek sowan

Prameswari                  : Inggih

Jayakatwang               : Kepriye anggonmu nggulawenthah sakabehe para putri ing Kadipaten Gelang-gelang

Prameswari                  : Pikantuk pangestu panjenengan kangmas Dipati, nyatanipun sadaya para putri tansah sumanggem ing parentah, mboten kesupen kula ngaturaken sungkem pangabekti mugi konjuk

Jayakatwang               : Taktampa gawe gedhene atiku, dikepenakne anggone sowan

Prameswari                  : inggih mangestokaken dhawuh.

Jayakatwang               : Bali marang sira Patih Kebo Mundharang

Kebo mundharang      : Inggih kados pundi Kanjeng Dipati

Jayakatwang               : Ing pasewakan dina iki ingsun bakal ngandharake sedyaku yaiku ingsun bakal njaluk wewenangku kang wus suwe diregem dening wong-wong Singasari

Kebo mundharang      : Kersanipun Kanjeng sinuwun menika kados pundi kok kirang ndungkap raosing batos kula

Jayakatwang               : Mangkene, ingsun bubar manjing ing Bale Pustaka. Ing kono disebutake lamun ingsun iki sejatine kang pantes nglungguhi praja Singasari. Jalaran leluhurku Prabu Dhandhanggendhis duk nalika samana disedani dening Akuwu Ken Arok ing Tumapel. Wekasan Ken Arok bisa ngedegake praja Singasari. Sawise Ken Arok murud ing kasedan jati anak turune Ken Arok kang nguwasani praja Singasari. Wiwit saka Anusapati, Tohjaya, Siwa Prabu Wisnuwardhana lan Kakang Prabu Kertanegara. Mula dina iki aku nduwe niat nungkulke Singasari jalaran iku darbeke Adipati Jayakatwang

Prameswari                  : Dhuh Kangmas mbok inggih dipunpenggalih malih

Jayakatwang               : Kepriye Yayi

Prameswari                  : Menawi panjenengan badhe nglurug dhateng Singasari, samenika kula aturi menggalih sinten Prabu Kertanegara menika. Menika ugi besan panjenengan ugi nak ndulur kaliyan panjenengan. Menapa badhe  kelampahan unen-unen “merangi tangan landhesan dhengkul”?

Jayakatwang               : Ora yayi, iki perkara hak waris. Leluhure Kertanegara wis nduwe utang nyawa marang leluhurku mula aku kang bakal nagih utang iku mau.

Adegan 2. Banyak Widhe teka

Jayakatwang               : Mangga-mangga Kakang Arya Banyak Widhe

Banyak Widhe            : Iya yayi dipati..

Jayakatwang               : Sami sugeng rawuhipun Kakang

Banyak Widhe            : Iya yayi Dipati, tekaku ora ana alangan sawiji apa. Taklimku tampanana Yayi

Jayakatwang               : Inggih kakang dhawaha sami-sami. Janur gunung panjenengan rawuh ing Kadipaten Gelang-gelang

Banyak Widhe            : Iya, Yayi Jayakatwang

Jayakatwang               : Kados pundi kakang?

Banyak Widhe            : Tekaku iki sepisan kepengin mangerteni kahanan ing Gelang-gelang, kaping pindho pun kakang kepengin tilik kasugengane yayi Adipati sakulawangsa dene jangkepe perlu mangkene yayi, dina iki kraton SIngasari ringkih jalaran wadya bala saperangan gedhe kautus nglurug menyang Swarnabhumi.

Jayakatwang               : Lajeng bab menika menapa wonten gandheng cenengipun kaliyan kula Kakang?

Banyak Widhe            : Ana, dina iki praja SIngasari ringkih,

Jayakatwang               : menapa kula kedah sabiyantu Prabu Kertanegara mrih saya kiyat nagari Singasari

Banyak WIdhe            : Kosik ta, durung tutug anggonku matur. Siadhi dina iki prayogane nglurug Singasari….

Jayakatwang               : Hlo, mangke riyin kakang kok panjenengan darbe pamanggih kados makaten dhasaripun menapa

Banyakwidhe              : ngene, saka rumangsaku praja Singasari kaasta dening Prabu Ciwabudha ya Prabu Kertanegara iki kahanane ora tentrem. Sabab sang Prabu amung nengenake bab jembare jajahan ora mikir bab kahanane kawulane. Kepara sang Prabu ketungkul anggone suka parisuka kombul bujana andrawina. Mula yayi, ya mung sliramu kang bisa ngadili Prabu Kertanegara. Coba dipenggalih

Jayakatwang               : Inggih kakang, sedya kula sekawit namung kepengin njongkeng kawibawanipun praja Singasari. Saya wimbuh grengseng ati kula sareng kula nampi kabar saking panjenengan menawi Singasari samangke ringkih.

Banyakwidhe              : Mula bab pangluruge si adhi becik rembugan klawan wadya balamu, pun kakang njaluk pamit bali mring Songeneb yayi

Jayakatwang               : Inggih sumangga Kakang, ndherekaken raharjanipun lampah…. Tih Kebo Mundarang

Kebo Mundharang      : Kula Gusti

Jayakatwang               : Metuwa njaba gelar baris nglurug Singasari

Kebo Mundharang      : Sendika mangestokaken dhawuh

Jayakatwang               : Pasewakan kena kabubarake.  

Babak 3.

Casting: Kebo Mundharang sawadya, Kebo Anengah, Senapati Gajah Pagon

sawadya,Ardaraja

Setting: Alas

Adegan 1. Kebo Anengah , Gajah Pagon njaga katentreman ing Singasari

Kebo Anengah            : Gajah Pagon lan kabeh prajurit Singasari

Gajah Pagon                : Kados pundi Ki Patih

Kebo Anengah            : Iki dina praja Singasari ringkih jalaran saperangan gedhe prajurit kautus nglurug menyang Swarnabhumi ya ing Malayu. Mula saka kuwi aja mbok kendhoni barismu, kepara rapetana.

Gajah Pagon                : inggih ki Patih sanajan ing mangke wonten pangamukipun parangmuka kula sawadya saged nyingkiraken jalaran SIngasari nedheng ketaman lara ayu dados kathah ingkang ngayunaken

Kebo Anengah            : Iya bagus hlo apa kae dhampyak-dhampyak

Adegan 2. Kebo Mundharang sawadya teka

Kebo Anengah            : Kebo Mundharang

Kebo Mundharang      : Inggih Gusti Patih Kebo Anengah

Kebo Anengah            : iki dudu dina pisowanan kok sira prapta ing laladan Singasari tur nggawa prajurit sagelar sepapan

Kebo Mundharang      : Ki Patih, kula dugi ing tapel wates praja SIngasari mboten badhe sowan Prabu Kertanegara nanging kula badhe nglurug perang, Sang Prabu Kertanegara kedah lengser saking kalenggahan

Kebo Anengah            : O cethane kowe mbarang ngamuk, heh Gajah Pagon cekelen Kebo Mundharang sawadyane…

Adegan 3. Kebo Anengah mengsah Kebo Mundharang

Kebo Mundharang      : Wadya Singasari wis kapracondhang kepara akeh kang ngemasi. Mula kowe nungkula Kebo Anengah

Kebo Anengah            : Tangeh nggendhong lamun kowe bisa ngrubuhake Singasari yen aku isih mbregagah

Kebo Mundharang      : Keparat tuwa pikun klakon takremet dadi klalare epek-epek kowe

Adegan 4. Kebo Anengah dilimpe dening Raden Ardaraja.

Ardaraja                      : Wa Patih Kebo Mundharang

Kebo Mundharang      : Inggih Raden

Ardaraja                      : Wa, aku wis krungu yen dina iki Kanjeng Rama Jayakatwang nglurug marang Singasari. Aku jejere anak kudu bisa mikul ndhuwur mendhem jero klawan wong atuwaku

Kebo Mundharang      : kersanipun Raden Ardaraja

Ardaraja                      : Dinane iki Kanjeng Rama Prabu Kertanegara lagi langen suka ing Taman Keputren, mula diage lurugen ing Taman Keputren mumpung durung kadenangan Kakang Dyah Wijaya saandhahane

Kebo Mundharang      : Sendika Raden

Babak 4

Setting: Taman sari

Casting: Kertanegara, Prameswari, Tribuana, Gayatri, Emban

Adegan 1. Prabu Kertanegara (wuru) kaadhep prameswari, para putri, lan dhayang

Kertanegara     : Ibune....

Prameswari      : Kula ramane

Kertanegara     : Mulya-mulyane urip ora kaya panjenenganingsun, dadi ratu gung binathara, jembar jajahanku, tur sinuyudan dening para kawula sapraja hahahaha... Embaann

Emban 1          : Kula Gusti

Kertanegara     : Kene unjukan karemenaningsun cawisna

Prameswari      : Kangmas Prabu

Kertanegara     : Piye ibune

Prameswari      : Kula aturi menggalih sarana penggalih ingkang wening, panjenengan menika jejeripun narendra ingkang gung binathara tur kathah kawula ingkang sumuyud ing sahandhap pepeda. Nanging karemenan panjenengan ingkang kirang trep menggahipun kula kangmas

Kertanegara     : Hahahahaha... kowe mesthi bakal ndakwa yen bab anggonku remen wuru ngunjuk tuwak lan waragang iki. Ibune sumurupa, yen sawijine narendra iku kwajibane utawa jejibahane ya mung mikir. Mangka yen wong mikir ning pikirane ora jenak ya tundhone ora wening. Mula aku ngunjuk iki kareben wening pikirku.

Gayatri            : Dhuh rama nyuwun pangapunten

Kertanegara     : (ngunjuk waragang) Hmmm... Gayatri

Gayatri            : Nyuwun pangapunten saderengipun, menawi pamanggih kula rama,,

Kertanegara     : Piye

Gayatri            : Para wasu pitri tuwin brahmana sampun netepaken bilih wuru menika kalebet maksiyat rama.

Tribuana          : Semanten ugi kula sumela atur rama,

Kertanegara     : Hmmm... ahhhh... Tribuana

Tribuana          : Inggih rama, leres aturipun Kanjeng ibu saha kangmbok Gayatri, menawi wuru menika kalebet larangan utawi awisan ing nagari Singasari jalaran saged ngrisak kasarasan Kanjeng Rama..

Kertanegara     : Hahahaha... Ibune, Gayatri lan kowe Tribuana. Wurune utawa mendeme sawijine ratu iku ora larangan jalaran kang wenang ngatur abang ijone paprintahan ing Singasari ya mung Ingsun Prabu Ciwabudha ya Prabu Kertanegara. Dadai cethane ora ana sing wani nglarang klawan kekarepanku. Yen wong cilik-cilik kae ora kena wuru kejaba Ingsun... Embaaannnn...!!!

Emban             : Ku..kula Sinuwun

Kertanegara     : Ngapa ndadak mandheg... kene diiseni maneh...

Prameswari      : Kangmas menika winastanan Gajah ngidak rapah, palang mangan tandur. Pranatan ing Singasari menika dipuncak-aken sedaya warga ing Singasari kalebet ratu

Kertanegara     : Ibune, wis aja kakehan kang dirembug cukup menenga, lan kowe Gayatri Tribuana. Sanajan aku iki kulawargamu nanging saliyane iku aku uga ratu gustimu. Kowe ora kena mejang klawan aku... Embaannn!!!

Emban             : Inggih sinuwun, menika sampun telas setunggal kendhi.

Kertanegara     : Tambahi maneh!!! Kowe ki piye kok nganti kentekan heee!!

Emban             : Nyuwun pangapunten sinuwun menika taksih kula padosne

Prameswari      : Emban kana age dicawiske maneh, aja gawe dukane kanjeng Sinuwun

Gayatri            : Kados pundi kanjeng ibu

Prameswari      : Wis turutana kersane ramamu wae Nini

Emban             : Inggih Gusti Ratu, menika sinuwun sampun kula cawisaken enggal

Kertanegara     : Hlahh ya mengkono. Nyambut gawe ki sing temen, kowe takingu ki mligi kanggo nyawisi unjukaningsun ngerti...

Emban             : Inggih sinuwun

Kertanegara     : Takpecat apa piye

Emban             : Inggih ampun ta Sinuwun

Kertanegara     : Takpecat klakon manggon neng Jarak kowe. Kene cawisne... Hmmmm...

Prameswari      : Sampun keladuk ta kangmas

Kertanegara     : Ibune... aku durung tuwuk anggonku ngunjuk. Ahhhh ... hmmm

Adegan 2. Prajurit sowan

Prajurit            : Adhuh sinuwun ketiwasan

Kertanegara     : Sapa sing sowan tanpa sun timbali iku. Sapa Bu?

Prameswari      : Menika abdi pacalang kangmas nanging kebak ing tatu dedamel. Mesakaken sanget kangmas

Kertanegara     : Hlahhh wis lumrah, jenenge abdi pacalang iku genah lagi gegladhen banjur kena sasarane tumbak

Prameswari      : Gayatri Tribuana piye iki

Gayatri            : Enggal kadangu kemawon ibu

Tribuana          : Inggih ibu kadosipun wonten bab ingkang mboten ngremenaken.

Prameswari      : Bocah prajurit ana kedadeyan apa kok nganti kowe tatu kaya mangkono?

Prajurit            : Adhuh Gusti Ratu, kawuningana Praja Singsari ing samangke kinepung wakul binaya mangap dening wadya sak...king... Gel.. (mati)

Prameswari      : Bocah prajurit... adhuh gek ana apa iki, kangmas Prabu...

Kertanegara     : Hmmm

Prameswari      : Kedhaton Singasari kinepung wakul binaya mangap... kados pundi kangmas?

Kertanegara     : Hahahaha... prajurit ngayawara, dheweke mati iku jalaran goroh anggone matur... wis kareben mati

Prameswari      : Ndhu Tribuana lan Gayatri

Gayatri            : Kados pundi ibu

Prameswari      : Wis nini, katone praja Singasari lagi ing swasana gawat. Mula kowe age mlajara liwat kori bebutulan. Golekana garwamu Dyah Wijaya Nini... age aja kesuwen

Gayatri            : Inggih sendika kanjeng ibu, ayo Yayi

Tribuana          : Mangga kangmbok

Adegan 3. Jayakatwang lan Kebo Mundaranag teka

Jayakatwang   : Amuk –amuk...!!!

Prameswari      : Kangmas menika Yayi Jayakatwang ingkang sowan

Kertanegara     : Hmmm... Jayakatwang. Kene rada maju

Jayakatwang   : Inggih Kangmas Prabu

Kertanegara     : Sejatine, kowe lan sapa kuwi

Kebo M           : Kula Patih Kebo Mundarang

Kertanegara     : Manjing ing taman kaputren kalebu luput amarga yen kowe butuh lan jenengingsun kudu sapatemon ing Sitinggil, nanging gandheng kowe iku adhiku mula taklilani. Ana wigati apa hmmmm...

Jayakatwang   : Kangmas, kula sowan menika sedya kula nglurug ing Singasari, panjenengan kedah nungkul dhateng kula

Prameswari      : Kados pundi kangmas

Kertanegara     : Hmmm kowe apa lagi mendem Jayakatwang haaa?? Mokal yen kowe bisa nungkulake Singasari takupamakne wong ngipi ing wayah awan.

Jayakatwang   : Nanging sedya kula badhe kasembadan, katitik wadya Singasari kathah ingkang kaseser jurit. Beteng Singasari sampun bedhah mila panjenengan kula aturi nungkul. Kula ingkang jumeneng nata ing Singasari

Kertanegara     : Hahahaha klakon taktumpes sacindhil abangmu kowe Jayakatwang

Jayakatwang   : Ratu ora urus tampanana pusaka piyandel Gelang-gelang

Prameswari      : Kangmas Prabu...!

Kertanegara     : Bune kowe mlayua..mlayu bune... (Kertanegara mati)

Jayakatwang   : Tih

Kebo M           : Kula sinuwun

Jayakatwang   : Prameswari Bajradewi lebokne pakunjaran

Kebo M           : Sendika

Jayakatwang   : Patih Kebo Mundarang, Ardaraja lan kowe kabeh

Koor                : Kula sinuwun

Jayakatwang   : Singasari wis sunbedhah. Mula ingsun bakal mindhah punjere paprintahan ana ing Kadiri, ingsun kang jumeneng nata ing kana kanthi jejuluk Prabu Jayakatwang. Ayo diusungi rajabrana Singasari

Koor                : nggih sendika

Babak 5.

Setting: Beteng

Casting: Wijaya, Ken Sora, Lawe, Nambi, Gajah Pagon, Tribuana, Gayatri

Adegan 1. Wijaya bakal ngundurake wadya Gelang-gelang

Wijaya                         : Paman Ken Sora

Ken Sora                     : Kados pundi Gusti Nararya

Wijaya                         : Wadhuh paman kecolongan, jebul wadya ing Gelang-gelang menika sampun limpad ing gelar baris katitik samangke sampun kasil mlebet ing kedhaton

Ken Sora                     : Lajeng kersanipun Gusti Nararya kadospundi

Wijaya                         : Samangke mangga Paman Ken Sora, kakang Lawe saha panjenengan Kakang Nambi. Ngempalaken prajurit bhayangkari ingkang taksih sugeng tumunten nggebag wadya Gelang-gelang.

Lawe                           : Raden, menawi bab wadya Gelang-gelang cekap kula piyambak ingkang badhe ngrampungi.

Ken Sora                     : mengko dhisik Lawe, yen ngrembug bab iki mung nggunakne okol tanpa akal bakale tuna kang kaping pindho. Becike ayo nylametake praja Singasari saka cengkremane wadya Gelang-gelang

Adegan 3. Gajah Pagon teka

Wijaya                         : Paman Gajah Pagon iki

Gajah Pagon                : Inggih Raden, ngaturaken ketiwasan, wadya Gelang-gelang samangke sampun kasil njebol beteng saha ngrisak kedhaton, kepara Kanjeng Sinuwun Prabu Kertanegara sampun gugur

Wijaya                         : Rama Prabu gugur!!!... sampun kedangon Paman Sora, mangga sami nggebag wadya Gelang-gelang

Ken Sora                     : Mangke riyin Raden, kula wau sampun matur. Menawi namung nggendelaken okol badhe kapitunan ing tembenipun

Nambi                         : Inggih Raden, prayogi panjenengan menggalih kasugenganipun kang garwa kekalih Dyah Tribuana saha Dyah Gayatri

Wijaya                         : O inggih Kakang leres panjenengan Kakang Nambi

Adegan 4. Tribuana lan gayatri teka

Wijaya                         : Oh… Yayi Gayatri lan Tribuana sukur sliramu isih slamet yayi

Gayatri                        : Inggih Pangeran, kula ajrih sanget pangeran

Tribuana                      : Dhuh pangeran kados pundi menika, kanjeng ibu Prameswari samangke dipunkunjara dening Paman Jayakatwang

Wijaya                         : Kados pundi Paman Ken Sora?

Ken Sora                     : Prayoginipun sumangga enggal oncat saking Singasari jalaran kula sumelang wonten telik sandhinipun Adipati Jayakatwang ingkang nedya munasika panjenengan Raden

Wijaya                         : Lajeng, ngayom dhateng sinten Paman

Lawe                           : Ngayom dhateng Songenep mawon Raden, mangke kula ingkang nglarapaken dhumateng Kanjeng Rama Adipati Banyak Widhe

Wijaya                         : Makaten inggih prayogi Kakang Lawe. Paman Gajah Pagon

Gajah Pagon                : kula Raden

Wijaya                         : Dina iki aku bakal tumuju ing Songeneb, takjaluk si Paman uga oncat saka Singasari mapana ing salor kulone Nermada Canggu.

Gajah Pagon                : Sendika Raden

Wijaya                         : Yayi Garwane pun kakang lan panjenengan Paman Sora, Lawe, saha Nambi. Sumangga enggal-enggal lumawat ing Sumenep.

Babak 6.

Setting: Omah desa

Casting: Lurah Kudadu, Ki Joko, Congik, lan Vischa

Adegan 1. Lurah Kudadu bawarasa klawan Ki Joko

Lurah                           : He Cekel

Joko                             : Kula Ki Lurah

Lurah                           : Leren sik sawetara, wis suwe anggonku ora tilik warga desa ing Kudadu kene.

Joko                             : Hla nggih ta Ki Lurah, njenengan niku saking tindak pundi kemawon kok ngantos nilar desa ngriki. Kula sing bingung, upami wonten wong njaluk surat-surat tur sing wonten tapak asmane panjenengan mangka panjenengan mboten wonten ing kelurahan.

Lurah                           : Cekel, ya ngene iki abot-abote ngemban dhawuh saka Gustimu ing Sumenep Sang Adipati Banyak Widhe kang paring dhawuh marang aku supaya mbiyantu bot-repote Gusti Sanggramawijaya anggone babat alas Tarik. Mula ya sing gedhe pangapuramu.

Joko                             : Napa sampun rampung Ki Lurah?

Lurah                           : Sik aku takndongeng, nalika samana Gustimu Raden Sanggramawijaya wis sowan ana ngarsane Kanjeng Adipati ing Sumenep. Banjur kasowanake ing ngarsane Sri Jayakatwang ing Kediri. Takkira Gusti Sanggramawijaya iki bakal dipidana, jebul diparingi alas gledhegan supaya diwangun dadi padhukuhan

Joko                             : Wah jebul nggih wicaksana nggih narendra Kadiri niku

Lurah                           : Anggepane Sinuwun Jayakatwang iku kang dadi mungsuh amung Sinuwun Prabu Kertanegara dudu Raden Sanggramawijaya. Hla dina iki anggone babat alas wis meh rampung, mula aku bali ing Kudadu.

Joko                             : Wah ketingale njenengan sayah niki,

Lurah                           : Iya, Cekel… aku butuh hiburan.

Joko                             : Ingkang dipunkersakaken kadospundi Ki Lurah

Lurah                           : Nyi Rerik timbalana mrene aku kangen swara kencanane

Joko                             : napa niku Ki Lurah?

Lurah                           : Swara emas… kana ndang timbalana.

(Saged dipunimprovisasi)

Adegan 2. Congik lan Vischa teka

Lurah                           : Sik sik, nitik sandhangane kowe iki dudu wong Kediri utawa wong Sumenep

Congik                        : Bener aku wong saka Tar-tar

Lurah                           : Tar-tar?

Congik                        : Iya abdine sesembahanku Kaisar Kubilai Khan

Lurah                           : banjur tekamu ing sudhungku kene ana wigati apa?

Congik                        : Cethane aku sawadya bala sing dipandhegani dening Panglima Ike Messi bakal ngrangket Ratu ing Singasari kang jejuluk Prabu kertanegara

Vischa                         : Iya, gandheng kowe asli wong kene mesthine genah lan ngerti papan dununge praja Singasari. Aku njaluk tulung larapna ing praja Singasari.

Lurah                           : Ngene sik jenengmu sapa?

Congik                        : Aku Cong Ik

Vischa                         : Vis Cha

Lurah                           : Ngertiya dina iki Singasari wis rubuh. Sinuwun Kertanegara wus gugur. Hla sing isih iki mung kulawangsane Prabu Kertanegara kang mapan ing Tarik ya ing Majapait

Congik                        : Iya saiki aku larapna taktumpese pisan

Lurah                           : Sik ta, prayogane sampeyan nganthi panglimamu ngadhep ing Tarik kareben cetha lan gamblang.

Congik                        : Piye iki

Vischa                         : Dituruti wae timbang kesuwen

Congik                        : Iya aku manut. Tuduhna panggonane

Lurah                           : ayo manuta aku.

Babak 7.

Casting: Jayakatwang, Kebo Mundharang, Ardaraja, Senapati Parungsari,

Ranggajanur, Segara Winotan.

Setting: Pendhapa

Adegan 1. Jayakatwang sawadya

Ardaraja                      : Ngaturaken ketiwasan Rama Prabu

Jayakatwang               : Ana wigati apa ngger sajak magita-gita anggonmu lumaku

Ardaraja                      : Rama, alas Tarik sampun kababat dening Kakang Sanggramawijaya

Jayakatwang               : Iya pancen Sanggramawijaya takutus mbabat wana Tarik kinarya papan dunung jalaran Singasari wis ludhes tanpa sisa

Ardaraja                      : inggih nanging rama, wekdal samangke Kakang Wijaya saha pendherekipun ngimpun kekiyatan badhe ngrebat kamukten ing Kediri.

Jayakatwang               : Kowe matur kang kaya mangkono dhasarmu apa?

Ardaraja                      : Awit Kakang Wijaya sampun manjer gendhera perang saha nanem wringin kurung sakembaran. Cetha menawi kakang Wijaya badhe ngembari panguwaos panjenengan Rama.

Jayakatwang               : Dudu karepe dhewe, siyaga ing gegaman, taktumpese Wijaya sawadyane

Parungsari                   : mangke riyin sinuwun, saderengipun panjenengan majeng ing palagan kula ingkang badhe ngrumiyini nigas jangganipun Wijaya

Segarawinotan            : Kula ugi mboten kantun sinuwun kula sagah minangka tawuring prang

Ranggajanur                : Sinuwun nadyan ajur kinarya sesawur, putung kinarya bebalang kula sagah ndhepani bumi Kediri

Jayakatwang               : Bagus, ndhisikana laku aku bakal sumusul ing mburi. Kebo Mundharang

Kebo Mundharang      : Kula sinuwun

Jayakatwang               : Siyagakne prajurit mawa gelar Emprit neba, byuki bathang sayuta Majapait

Kebo mundharang      : sendika sinuwun.

Babak 8.

Casting: Sanggramawijaya, Arya Wiraraja, Lawe, Ken Sora, Nambi, Ikke Messi sawadya.

Setting: Pendhapa

Adegan 1. Wijaya sapendherek lan Arya Wiraraja ngrembug bab kahanan Majapait

Wijaya                         : Paman Adipati Arya Banyakwidhe

Banyakwidhe              : Kula nakmas

Wijaya                         : Samenika kula sampun saged mbangun alas Tarik ugi sampun kaparingan nami Majapait. Sisanipun wadya Singasari ugi kathah ingkang ngrojongi pikajeng kula supados ngrebat panguwaos ing Kediri.

Banyakwidhe              : Mangke riyin nakmas, panjenengan menawi badhe ngrabasa ing Kediri mangkenipun saged dipunwastani menawi panjenengan menika mboten ngertos lelabetanipun tiyang sanes. Mboten kok kula ngewangi kang Paman Prabu Jayakatwang, nanging kekiyatan Majapait taksih dereng saged timbang kaliyan wadya Kediri.

Wijaya                         : Lajeng mbenjang menapa kula saged ngrebat kamukten ing Kediri. Sakawit panjenengan dhawuh bilih anggen kula pasrah bongkokan dhumateng Paman Jayakatwang saha mbabat alas Tarik lajeng nggebag Kediri. Mangka samenika anggen kula mbabat sampun rampung.

Lawe                           : Inggih Rama kula sampun sawega lair batos badhe nggebag Kediri.

Banyakwidhe              : Inggih kula ngertos nanging panjenengan sampun ngantos nggelak wanci nggege mangsa. Prajurit Kediri langkung kathah cacahipun. Pramila kula aturi sabar nakmas.

Adegan 2. Ikke Messi lan Shin Phe teka ing Pendhapa

Wijaya                         : Paman Ken Sora

Ken Sora                     : Kula Gusti Nararya

Wijaya                         : Menika wonten pawongan ingkang sowan, kula aturi murba

Ken Sora                     : inggih, He Kisanak, sira iku sapa lan nduwe karep apa.

Ikke Messi                   : Iya Tuan, aku Panglima Ikke Messi saka Tar-tar. Dene tekaku mrene bakal numpes wong-wong Singasari andhahane Prabu Kertanegara

Lawe                           : Iblis laknat piye!!!

Banyakwidhe              : Sik-sik sabar Lawe, aja keburu nafsu. Coba takpurbane. Tuan…

Ikke Messi                   : Kowe sapa… cetha yen iki wong-wong ing Singasari mula manuta takrangket taksowanake sesembahanku Kaisar Kubilai Khan..

Banyakwidhe              : Iya aku ngerti, iki kabeh pancen wong-wong Singasari. Kae Raden Sanggramawijaya, iki putraku Lawe, kae Ken Sora lan Nambi dene aku Bupati ing Sumenep jenengku Banyakwidhe

Ikke Messi                   : Wis dina iki nungkula kabeh bakal takrangket

Banyakwidhe              : Yen panjenengan bakal ngrangket priyayi ing kene mesthi bisa nanging, apa ora prayoga panjenengan ngrangket ratu kang wus bisa ngrubuhke Singasari

Ikke Messi                   : Banjur apa bathiku yen aku bisa ningkes wong sing wis bisa ngrubuhke Singasari.

Banyakwidhe              : Sepisan, panjenengan bakal antuk nagara jajahan, kapindho, panjenengan bakal antuk mas picis rajabrana saka kraton Kediri.

Ikke Messi                   : Piye Shin Phee?

Shin Phee                    : Kula namung ndherek kersa panjenengan

Ikke Messi                   : Iya, Banyakwidhe aku manut kowe. Nanging kanthi prajanjen yen nganti Kediri wis bisa ditungkulake, Kediri bakal dadi jajahan Tar-tar.

Banyakwidhe              : Iya, yen perlu mengko wong-wong Majapait bakal sabiyantu. Saiki ndhisikana laku

Ikke Messi                   : Iya yen ngono aku ndhisiki laku.

Wijaya                         : Paman Banyakwidhe

Banyakwidhe              : Kados pundi Nakmas?

Wijaya                         : Menika kados pundi kersa panjenengan kok masarahaken nagari Kediri dhateng wadya sabrang niki wau

Ken sora                      : Kakang Adipati, menapa mboten muspra anggen kita mangun Majapait ingkang ing tembenipun namung dipunparingaken tiyang-tiyang Tar-tar?

Banyakwidhe              : Menika namung samudana, wadya Tar-tar menika prajuritipun kathah. Kula pitados saged nelukaken Kediri, menawi sampun kasil nelukaken Kediri, Lawe saha Ken Sora enggal-enggal ngrabasa wadya Tar-tar saha ngobong praunipun tiyang-tiyang Tar-tar.

Wijaya                         : O makaten, inggih kula sampun cetha. Kakang Lawe, Paman Sora saha Kakang Nambi. Mangga sabiyantu wadya tar-tar.

Koor                            : Mangga Gusti Nararya         

Babak 9.

Casting: Wadya Tar-tar, Wadya Kediri, Wadya Majapait.

Setting            : Alun-alun Kediri

Adegan 1. Ranggajanur, Segara Winotan kepethuk Ranggalawe perang. Ranggajanur lan Segara Winotan gugur.

Ranggajanur                : Iki Senapati Lawe

Lawe                           : Ora kleru aku Lawe, kowe Ranggajanur lan Segara Winotan

Segara Winotan           : Iya, apa karepmu dene macak baris lan ngrabasa Kediri.

Lawe                           : Cekak cukupe dina iki Prabu Jayakatwang kudu mudhun saka dhampar keprabon

Ranggajanur                : Klakon sedyamu yen wis tugel guluku

Lawe                           : Majuwa sajangkah takremet klakon dadi klalare epek-epek!!

Adegan 2. Parungsari mungsuh Dyah Wijaya

Parungsari                   : Hamuk-hamuk ndi wong-wong Majapait iki tandhingana Senapati Parungsari!!

Wijaya                         : Iki senapati wanita ing Kediri

Parungsari                   : Ora kleru, heh Dyah Wijaya bagus rupamu nanging letheg gegedhohanmu. Mula manuta bakal taktugel gulumu

Wijaya                         : Tinimbang kowe mungsuh aku luwung kowe manuta takdadekne garwaku. Manuta wong ayu…

Parungsari                   : Wijaya, aja sembrana klakon pecah dhadhamu

Wijaya                         : Manuta sun emban sun pondhong

Parungsari                   : Tampanana pusakaku iki (Parungsari gugur kena pusakane Nambi)

Wijaya                         : Kakang nambi…

Nambi                         : Awrat Gayatri napa Parungsari…mangga kalajengaken malih Raden.

Adegan 3. Kebo Mundharang lan Ardaraja ngroyok Ken Sora

Ardaraja                      : Menungsa lumuh dibeciki kowe Sora

Ken Sora                     : Kepara kuwalik, kowe sageranganmu nungkula jalaran wus kumawani nggebag ing Singasari.

Ardaraja                      : Paman Kebo Mundharang cekelen Sora.

(Kebo Mundharang gugur, Ardaraja gugur kakrubut wadya Tar-tar)

Adegan 4. Jayakatwang lan garwane

Jayakatwang               : Yayi Ratu

Prameswari                  : Kula sinuwun

Jayakatwang               : Kaya wus teka kalamangsane yen punkakang kudu bali ing alam kamuksan, mula ayo takdherekake ngeningke cipta

Prameswari                  : Sumangga sinuwun

Adegan 5. Ikke Messi sawadya teka

Ikke Messi                   : Hla iki ratu Kediri, ayo tugel gulune

Wadya tar-tar              : Hlo Ratu Kediri ilang…Jayakatwang ngilang…

Adegan 6. Lawe lan Sora nggempur Wadya Tar-tar

Babak 10.

Casting: Wijaya sawadya

Setting: Pendhapa

Adegan 1. Wijaya jumeneng ratu

Wijaya                         : Ingsun jumeneng nata ing Majapait kanthi jejuluk Sri Kertarajasa Jayawardhana. Paman Arya Banyakwidhe kula paringi bumi sasigar semangka jajahan Kediri ingkang sisih wetan. Paman Ken Sora ingsun tetepake minangka pepatih ing Daha kanthi sebutan Patih Lembusora, ngrangkani Diajeng Gayatri. Kakang Lawe sun wisudha minangka Manteri Nusantara ugi Adipati ing Tuban kanthi sebatan Adipati Ranggalawe. Dene kang minangka patih Amangkubumi, sun tetepake Kakang Nambi kanthi sebutan Patih Mpu Nambi. sapa sing ora sarujuk gage matura!

Ranggalawe                : Kula mboten sarujuk!!!!!!

(Candhake Carita Dahuru ing Majapait)